ပေါက်တောမြို့မ ရဲစခန်းကို AA သိမ်းပိုက်
ဧရာဝတီ၊ နိုဝင်ဘာ ၁၆၊ ၂၀၂၃
ရခိုင်ပြည်နယ်၊ ပေါက်တောမြို့မ ရဲစခန်းကို ရက္ခိုင့်တပ်တော် (AA) တပ်ဖွဲ့ဝင်များက နိုဝင်ဘာ ၁၅ ရက်တွင် တိုက်ခိုက် သိမ်းပိုက်လိုက်ကြောင်း သိရသည်။
ယမန်နေ့ ည ၁၀ နာရီဝန်းကျင်တွင် ပေါက်တောမြို့မ ရဲစခန်းမှ သေနတ်သံ ၁၀ ချက်ခန့်ထွက်ပေါ်ခဲ့ပြီးနောက် စခန်းတခုလုံး လက်နက်ချ အညံ့ခံလိုက်ခြင်း ဖြစ်ကြောင်း ပေါက်တောမြို့ခံတဦးက ပြောသည်။
၎င်းက "AA က လက်နက်ချဖို့ ညှိနှိုင်းတာ၂ ရက်လောက် ရှိပြီလို့ သိရတယ်။ တပ်သားတွေကတော့ လက်နက်ချမယ်၊ အရာရှိတွေက လက်နက် မချလိုဘူး။ အဲဒါကြောင့် ကြန့်ကြာနေတာ။ မနေ့က ည ၈ နာရီလောက်မှာ AA က ဝင်တိုက်မယ် လုပ်တော့မှ စခန်းတခုလုံး လက်နက်ချကြတာ" ဟု ဧရာဝတီသို့ ပြောသည်။
လက်ရှိအခြေအနေတွင် ပေါက်တောမြို့မ ရဲစခန်းကို AA က သိမ်းပိုက်ထားသလို မြို့နယ်ထွေအုပ်ရုံးနှင့် လဝက ရုံးတို့၌လည်း အလံဖြူထောင် ထားကြောင်း မြို့ခံများက ပြောသည်။
စစ်ကောင်စီတပ်ဖွဲ့ဝင်များအား လက်နက်ချရန် AA က ပြောဆိုထားပြီး အညံ့မခံလိုသူများကို တိုက်ခိုက်သွားမည်ဟုလည်း သတိပေးထားသည်။
ယမန်နေ့တွင်လည်း ရမ်းဗြဲမြို့နယ်၊ ကျောက်နီမော်နယ်မြေရဲစခန်းမှ ဒုရဲအုပ်တဦး လက်နက်နှင့်အတူ AA ထံအလင်းဝင်ခဲ့ပြီးနောက် ကျန်တပ်ဖွဲ့ဝင်များလည်း စခန်းကို စွန့်ခွာသွားကြကြောင်း ဒေသအခြေစိုက် မီဒီယာများတွင် ဖော်ပြထားသည်။
ထို့ပြင် မြောက်ဦး တိမ်ညိိုရဲစခန်းမှ တပ်ဖွဲ့ဝင်များနှင့် မင်းပြား ရာမောင်ရဲတပ်ဖွဲ့ဝင်များ စခန်းစွန့်ခွာခြင်း၊ ထွက်ပြေးခြင်းများရှိနေပြီး၊ နယ်ခြားစောင့်တပ်စခန်း၊ ရဲစခန်းများအပါအဝင် စခန်းပေါင်း ၄၀ နီးပါး စစ်ကောင်စီ စွန့်လွှတ်ခဲ့ရကြောင်း AA က နိုဝင်ဘာ ၁၄ ရက်တွင် ထုတ်ပြန်ထားသည်။
